![Tumachi Mahiti [तुमची माहिती]](https://blogger.googleusercontent.com/img/a/AVvXsEhv3qn10E1a3bwjXka8oSlFFtDwJlqF64BolNZta6da9JEQ2_mQBXnxtSSi6IdJFSrnNxhsBBQN_pLJ7Ofgwh83l9AjqUDTxs3yntKRaLYI3v-VBqHV2zq-UwPED6KZZQuHRfCL0EGhBgQiOqRPAN_5VjxRanx_NYHelR8mfg0S2T3XHuBNr-LzBIZu=s999)
दि. 12 जून : काल पालघर जिल्ह्यामध्ये एका दिवसांत 108 नवे कोरोना रुग्ण निष्पन्न झाले होते. त्यातील 42 वसई विरार महानगर क्षेत्रातील तर 66 पालघर जिल्ह्याच्या ग्रामीण भागातील होते. धक्कादायक म्हणजे ग्रामीण भागातील 66 रुग्णांमध्ये 38 स्त्रीयांचा समावेश आहे. आज वसई महानगर क्षेत्रातील कोरोनाबाधीतांची संख्या समजू शकली नसली तरी, ग्रामीण भागात 35 नवे कोरोना रुग्ण आढळले असून त्यातील तब्बल 25 स्त्रीया आहेत.
पालघर जिल्ह्याच्या ग्रामीण भागात कोरोनाचा संसर्ग वेगाने वाढत असल्याचे निष्पन्न होत असून 11 जून रोजी पालघर जिल्ह्याच्या ग्रामीण भागात एका दिवसांत 66 नवे कोरोना पॉझिटीव्ह आढळले आहेत. विक्रमगड तालुक्यात सर्वाधिक 33, वाडा तालुका 21, वसई तालुका 8, पालघर तालुका 3 व डहाणू तालुका 1 अशी नव्या कोरोना बाधीतांची तालुकानिहाय संख्या आहे.
आजमितीस पालघर जिल्ह्यात 1585 कोरोना पॉझिटीव्ह व्यक्ती आढळल्या आहेत. त्यातील 809 व्यक्ती संसर्गमुक्त झाल्या असून 724 रुग्णांवर उपचार चालू आहेत. 52 जणांचा मृत्यू झाला आहे. कोरोना संसर्गित व्यक्तींची तालुकानिहाय आकडेवारी खालीलप्रमाणे:-
• वसई विरार महानगरपालिका क्षेत्र – 1288 (46 मृत्यू)
• वसई ग्रामीण तालुका – 64 (3 मृत्यू)
• पालघर तालुका – 105 (3 मृत्यू)
• विक्रमगड तालुका – 43
• डहाणू तालुका – 41
• वाडा तालुका – 41
• जव्हार तालुका – 3
पालघर जिल्ह्यातील 809 कोरोनासंसर्गीत व्यक्तींनी कोरोनावर मात केली आहे. अशा कोरोनामुक्त झालेक्या व्यक्तींची तालुकानिहाय आकडेवारी खालीलप्रमाणे:-
• वसई विरार महानगरपालिका क्षेत्र – 708
• वसई ग्रामीण तालुका – 34
• पालघर तालुका – 42
• डहाणू तालुका – 19
• वाडा तालुका – 5
• जव्हार तालुका – 1
पुणे : जिल्हा कौशल्य विकास रोजगार व उद्योजकता मार्गदर्शन केंद्राच्या वतीने नोकरीकरीता बेरोजगार युवक युवतींसाठी ऑनलाईन रोजगार मेळाव्याचे आयोजन करण्यात आले आहे. या मेळाव्यातून जिल्ह्यात सुमारे अडीच हजाराहून अधिक रिक्त पदे भरण्यात येणार आहेत.
कोरोनाच्या पार्श्वभूमीवर लॉकडाऊनमुळे परप्रांतीय कामगारांचे जिल्ह्यातून इतर राज्यात स्थलांतर झाले आहे. त्यामुळे औद्योगिक कंपन्यांना मोठ्या प्रमाणात मनुष्यबळाची कमतरता भासत आहे. या पार्श्वभूमीवर पुणे जिल्ह्यातील नामांकित आस्थापना, कंपन्यांमधील विविध प्रकारच्या रिक्तपदाद्वारे मोठी सुवर्णसंधी देऊ केली आहे.
या ऑनलाईन रोजगार मेळाव्यांतर्गत जिल्ह्यातील विविध उद्योजकांकडे मशीन ऑपरेटर, वेल्डर, फिटर, पेंटर, शीटमेटल वर्कर, डिझेल मेकॅनिक, ऑटो मेकॅनिक, मेसन, प्लंबर, इलेक्ट्रीशियन, कारपेंटर, ग्राइंडर, टर्नर, मशिनिस्ट, इंजिनिअरिंग डिप्लोमा, प्रोग्रॅमर, बीडीई, पायथॉन डेव्हलपर, सॉफ्टवेअर, हार्डवेअर इंजिनिअर, अकाउंटंट, टीग वेल्डर या पदांसाठी आवश्यक पात्रताधारक तसेच, इयत्ता सातवी ते नववी, दहावी, बारावी, पदवीधर उमेदवारांसाठी एकूण अडीच हजार पेक्षा अधिक रिक्त पदे उपलब्ध करुन दिली आहेत.
हा मेळावा केवळ ऑनलाईन पसंतीक्रम नोंदविणा-या उमेदवारांसाठीच घेण्यात येणार आहे. त्यामुळे पुणे जिल्ह्यातील इच्छुक उमेदवारांनी आपल्या युझर आयडी व पासवर्डच्या आधारे विभागाच्या www.mahaswayam.gov.in या संकेतस्थळाद्वारे लॉगइन करुन आपल्या शैक्षणिक पात्रतेनुसार उचित असलेल्या रिक्त पदासाठी आपला पसंतीक्रम ऑनलाईन पध्दतीने नोंदवावेत. पसंतीक्रम नोंदविताना शक्यतो आपण वास्तव्यास असलेल्या ठिकाणाच्या आसपासच्या कंपन्यांची तसेच आवश्यक पात्रता धारण करीत असल्याची खात्री करुन पदाची निवड करण्याची दक्षता घ्यावी.
उमेदवारांना त्यांच्या मुलाखतीचे ठिकाण, दिनांक आणि वेळ एसएमएस अलर्टद्वारे कळविण्यात येईल. ऑनलाईन किंवा ऑफलाईन मुलाखतींचे आयोजन करण्यात येईल. इच्छुक युवक युवतींनी 22 जूनपर्यंत आपापले पसंतीक्रम नोंदवून या संधीचा लाभ घ्यावा, असे आवाहन सहायक आयुक्त अनुपमा पवार यांनी केले आहे.
