तुमच्या नावावर जमीन असेल तर तुम्हाला मिळणार 'फार्मर आयडी'

शेतकऱ्यांची संपूर्ण माहिती आता एका क्लिकवर मिळणार

तुमच्या नावावर जमीन असेल तर तुम्हाला मिळणार 'फार्मर आयडी'

केंद्र शासनाच्या डिजिटल पब्लिक इन्फ्रास्ट्रक्चर फॉर अॅग्रिकल्चर अॅग्रिस्टॅक हा उपक्रम संपूर्ण देशात राबविण्यात येणार आहे. यामध्ये शेतकऱ्यांचा व त्यांच्या शेताचा आधार संलग्न माहिती संच म्हणजेच फार्मर आयडी दिला जाणार आहे. हा आयडी ऑनलाइन उपलब्ध राहणार आहे. डिजिटल स्वरुपाच्या या आयडीमध्ये शेतकऱ्यांच्या नावासह त्याची शेतजमीन कुठे कुठे आहे, याची माहिती उपलब्ध होणार आहे.

फार्मर आयडी सादर केल्यानंतर शेतकऱ्यांना कुठलीही कागदपत्र देण्याची आवश्यकता पुढील काळात भासणार नाही.

त्यादृष्टीने शेतकऱ्यांची माहिती गोळा करण्याचे काम कृषी विभागाने सुरू केले आहे. यामध्ये शेतकऱ्यांच्या सातबाराला आधार नंबर लिंक केला जात आहे.

प्रत्येक शेतकऱ्याला युनिक आयडी देणार

प्रत्येक शेतकऱ्याला फार्मर आयडीच्या माध्यमातून एक स्वतंत्र क्रमांक उपलब्ध झाल्याने देशभरात हा क्रमांक त्याच शेतकऱ्याकडे असणार आहे.

बँक, आधार, पॅनचा डेटा मिळणार

या फार्मर आयडी क्रमांकाला शेतकऱ्यांचा बैंक खाते क्रमांक, आधार क्रमांक, पॅनचा डेटादेखील जोडला जाणार आहे.

या कामकाजाच्या पूर्ततेसाठी मास्टर ट्रेनर नियुक्त केले आहे. याचे प्रशिक्षण दिले जाणार आहे. या पद्धतीची माहिती संकलित होत आहे

फार्मर आयडी' यासाठी ठरणार महत्त्वाचा

कुठल्याही योजनेची अमंलबजावणी, पीक कर्ज काढणे आदींसाठी फार्मर आयडी महत्त्वाचा ठरणार आहे.

काय कागदपत्रे लागणार ?

• या योजनेमध्ये शेतकऱ्यााचा आधार क्रमांक, सातबारा, आठ-अ ही कागदपत्र संकलित होणार आहेत.

 प्रत्येक तालुक्याला ही मोहीम पूर्ण  करायची आहे.

शेतकऱ्यांचा मनःस्ताप वाचणार

सध्या शेतकऱ्यांना कृषी योजनांसाठी अर्ज केल्यानंतर प्रत्येकवेळी पडताळणीला सामोरे जावे लागते. त्यात खर्च होतो. तसेच शेतकऱ्यांना कार्यालयात हेलपाटे मारावे लागतात. मात्र, आता हा मनःस्ताप टळणार आहे.

महसूल विभागाकडे सोपविली जबाबदारी

उपविभागीय अधिकारी हे तालुका समितीचे अध्यक्ष असून, प्रत्येक अधीनस्त तालुक्यासाठी तहसीलदार तालुका उपविभागीय कृषी अधिकारी, तालुका कृषी अधिकारी, गटविकास अधिकारी यांची संयुक्त समिती यांच्या माध्यमातून अमंलबजावणी होत आहे.